قدم موقع دورات دورة عن
Sand Sculpture – النحت على الرمال
من قبل النحاتين بملتقى كويتي وافتخر السادس
الدورة مدتها ساعه وهناك فترتان باليوم
اول فترة من الساعه 5 الي 6 مساءا
والثانية من الساعه 7 الي الساعه 8 مساءا
وبامكانكم التسجيل اونلاين والدفع مباشرة او زيارتهم بالبوث والاشتراك
قبل البداية احب اشكر موقع دورات لانها اتاحت لي الفرصة بان اعيش تجربه تعليم النحت على الرمال
وشكر خاص للاخوي ناصر اسماعيل على جهوده الطيبة الي اخلجني بتعاملة الراقي معاي شخصيا شكرا لك اخوي
بدات دورتي الساعه 7 وتوجهت لبوث دورات
ودخلت بالمكان المخصص للدورة وهي على شكل قبه
وهذا مكان الدورة مجهز بالكراسي
وهذي بعض الادوات الي يستخدمونها في النحت
وصل احدى فريق النحاتين
وكان معاه استاذة فاضلة تقوم بالترجمه
قبل لا تبدي الدورة قالت انا انا معلمة متقاعدة وحبيت ارد جميل الكويت وتطوعت للترجمه
معلمتي اكن لكي كل الشكر والتقدير لجهودك الواضحة معانا بهذا اليوم واكن لك حبك واخلاصك لهذا البلد
وبدائنا بالدورة اول بالشرح ومن ثم بالتطبيق
استغرق عمل نحت الرمال بملتقى كويتي وافتخر شهر واستخدم 4000 طن من رمال الكويت
والفريق موكن من 9 اشخاص وهي اكبر منحوتات بالشرق الاوسط
وهذي الادوات الخاصة بالنحت على الرمال
والان نطبق عملي
قالو لنا انه لازم ما نحط ماي واايد مع الرمل ويصير طين
لازم نحط ماي شوية لانة تربه الكويت ناشفة
وتم تجهيز لنا قاعدة الرمل الي راح نشتغل عليها
يتم وضع رمل وبعدين شوية ماي وبعدين رمل وهكذا
وبعد ما يخلص ياخذ لوحة خشبية ويطق قالب الرمل عشان يقدر يشيله
ولما طلع لنا هذا القالب الدائري
والحين راح يعلمنا شلون نخلي السطح مستقيم خالي من الشوائب
وشلون لو طاح الرمل شلون نقدر نصلحة
من خلال هذي الاداه
بعد ما علمنا قال لنا شلون نقدر نحفر
والحين بعد ما علمنا قال لنا لازم نخطط شنو نبي نسوي
وهذا شغل احدى المتدربات
الحين وصل دوري استلم قالبي كان اكبر قالب
فكرت شنو ابي اسوي مابي شي اعتيادي الكل مسوية
قلت ارسم شعار البلوق
طلعت صورة الشعار للنحات وقلت له ابي اسوي نفسها
كانت روحة اتييين قالي راح نرسمها مايلة احسن عشان يبين الشعار
قلت اوكي طبعا قلت له انا راح ارسم الاساس والتفريغ راح تعلمني علية
رسمت الاساس وقالي شاطرة تشجعت وتحمست اشوف النهاية
علمني على اساس التفريغ وبديت افرغها بنفسي
لين وصلت لهذي النتيجه المرضية كاول مرة اسويها
وباخر شي زينها لي
وطلبت يصورون مع الشعار
انصحكم ومن كل قلبي انكم تعيشون هذي التجربه الاكثر من رائعة
والي عندة موهبه راح يتعلم الاساس والباجي راح يستعين من نسج خيالة
انا عن نفسي راح اتعمق بهذا الفن والنحت على الرمل لاني حبيتها